Главные новости Сарыкольского района – Qostanai Media

Яғни, «Алтын алқа» және «Күміс алқа» мемлекеттік наградалары өз иелеріне табысталды

Ауылдағы мектепте өткен салтанатты шара барысында аналарды аудан әкімінің орынбасары Данияр Шарипбаев өңір басшысының атынан құттықтап, ананың бала тәрбиесіндегі және қоғамдағы жоғары рөлін атап өтті.

– Мемлекет басшысы Қасым-Жомарт Тоқаевтың 30-қыркүйектегі Жарлығына сәйкес, көпбалалы аналарға мемлекеттік наградаларды беру шешімі бекітілді. Міне, бүгін соны табыстаудың сәті түсіп отыр. Қадірменді аналар, Сіздер, қандай құрметке де лайықсыздар! Сіздерге зор денсаулық, отбасыларыңызға амандық тілеймін, – деді Данияр Әнуарұлы.

Шарада 32 жастағы 8 баланың анасы Ұлтуған Сүндеталина «Алтын алқа» иегері атанса, ал 36 жастағы 6 баланың анасы Светлана Сундеталина «Күміс алқаны» омырауына тақты.

– Соналы ауылы киелі жер. Алдынғы буын апа-әжелеріміздің жолын жалғап, көп балалы ана атанып, бақыт құшағына бөленіп отырмыз. Мемлекет те қамқорлық көрсетіп келеді. Жалпы, әйел үшін басты бақыт – ана атану. Бізідң ең басты байлығымыз – осы балаларымыз. Болашақта соларды тәрбиелі, білімді азамат қылып өсіргіміз келеді. Біздей жас аналарға көрсетіп отырған құрмет, қамқорлық үшін алғысымызды айтамыз, – дейді көп балалы аналар.

Айта кеткен жөн, аналарды ұлықтау рәсіміне Тәгіл ауылдық округінің әкімі Сағынбай Сүндеталин, мектеп директоры Балдырған Халикова және ауыл ақсақалы Қаппас Бекмағамбетов қатысып, ардақты жандарға жүрекжарды лебіздерін жеткізді.

Қорыта айтқанда, «Адам өміріндегі ең үлкен қуаныш – бала сүю» – деп Бауыржан Момышұлы бабамыз айтқандай, балалы болу бақыт, ал көп балалы болу одан да үлкен бақыт. Сонымен қатар, көп баланың анасы болу нағыз ерлікке жатады.

Руслан ӘЛКЕЕВ