Құрбан айт – құтты мереке

11-тамызда басталған қасиетті Құрбан айт мерекесі жалғасуда

Сол күні таң сәріден «Аққозы қажы» аудандық орталық мешітіне жиналған сарыкөлдік мұсылман қауымның есебінде қисап болмады. Ұлық мейрамда мінәжат үшін мешітке келген айт намазын оқыды.

Бас имам Дәулетбай қажы Әбдіхалық жиналғандарды құттықтап, Құрбан айттың қадір-қасиеті, құрбандық пен қажылық жөнінде уағыз-насихат айтты.

Мешіт жанында құрбандық шалынып, көпшілікке айт дастарханы жайылды. Алыс-жақыннан келген ағайындар бір-біріне ізгі ниет, ақ тілектерін айтып, дұға жасады.

Мешіт жамағаты қосылып, балақайларға тәтті сый таратты.

Айт мерекесінің игілікті шаралары ертең спорттық ойын шараларына жалғаспақ.

Руслан ӘЛКЕЕВ