Сарыкөл ауданында барлық 22 білім мекемесінде жазғы мектептер өз жұмысын жүргізуде

8 маусым күні аудандық білім бөлімінің басшысы Перизат Сапарова аудан орталығындағы қос мектепті аралады

Айталық, Ө.Сұлтанғазин атындағы жалпы білім беретін орта мектеп пен Урицк мектеп-лицейіне арнайы барып, жазғы мектептердің жұмысымен танысты. Мектеп директорларымен, мұғалімдер және оқушылармен кездесті. Әсіресе, дене шынықтыру мен психология пәндері мұғалімдерінің жұмысына баса назар бөлді. Жалпы, қашықтан оқыту кезінде оқу үлгірімі нашарлаған оқушылармен қалай жұмыс жүргізіліп жатқанына көз жеткізді.

-Үлгерімі төмен балаларға көп көңіл бөлуіміз керек. Бізде, әдетте, талантты әрі дарынды және үлгерімі жақсы балаларға көп көңіл бөлінеді. Ондай балалармен жұмыс істеу оңай әрі қызық екені түсінікті. Алайда, бұл жағдайда басты назар үлгерімі төмен балаларға аударылуы тиіс. Және олардың қашықтан оқыту кезінде жіберген олқылықтарының орнын толтыру. Біздің басты мақсатымыз – осы, – дейді Перизат Смайылқызы.

Айта кеткен жөн, 26 мамырда басталған жазғы мектептердің жұмысы 19 маусымға дейін жалғасады. Бұл ерікті түрде жүзеге асырылуда және қосымша қаржыландыруды да қажет етпейді. Сонымен қатар, бұл бос уақытты тиімді пайдалануға үлкен мүмкіндік. Яғни, баланы жазғы мектепке қабылдау үшін ата-ана өтініші бойынша жұмыс жүргізілді. Және де мектепке келгісі келген барлық бала тегін қатыса алады.