Главные новости Сарыкольского района – Qostanai Media

Аудан әкімдігінде аудандық орталық аурухананың бас дәрігері Жұмағали Құсаиновты құрметті демалысқа шығарып салуға арналған салтанатты жиналыс өтті.

Оны аудан әкімі Амантай Балғарин ашып, жүргізіп отырды. Оған облыстық денсаулық сақтау басқармасының басшысы, аудан активі, кәсіпкерлер және аурухана ұжымы қатысты.

Жиын барысында өңір басшысы Амантай Кәкімбекұлы саналы ғұмырын қызметке сарп еткен, адал еңбекті жанына міндет еткен азамат Жұмағали Құсаиновты зейнеткерлік демалысқа шығуымен құттықтап, сый-сыяпат жасады.

– Ерінбей еңбек еткен жан осындай дәрежеге жетеді. Қай кезде де адал еңбектің бағасы биік. Оның үстіне туған жерінде, бір жерде табан аудармай еңбек етудің өзі үлкен бақыт, – деді аудан әкімі өз сөзінде.

Одан әрімен облыстан келген мейман Вячеслав Дудник сөз сөйледі. Сондай-ақ, «Нұр-Айгер-СК» ЖШС директоры Серікбай Жұмағұлов та жүрекжарды лебізін жеткізді.

Құрметті демалысқа шыққан Жұмағали Көкенұлы 1985 жылы Қарағанды медициналық институтын бітіріп, Қостанай қалалық перзентханасына жіберілген.

Интернатураны аяқтағаннан кейін, 1986 жылдың тамызында Урицкий орталық ауруханасына акушер-гинеколог ретінде қабылданып, сол жылдың қазан айынан бастап Весело-Подол учаскілік ауруханасының бас дәрігері болып ауысты.

1993 жылдың қазан айынан бастап Урицкий орталық ауруханасының бас дәрігері болып тағайындалды. Содан 26 жыл бойы тапжылмастан еңбек етіп, абыройлы зейнет демалысына шығып отыр.

Әрине, адам жастайынан бойына сіңірген білімі мен алған тәлім-тәрбиесі, көрген тәжірибесі мен атқарған тынымсыз еңбегінің арқасында осындай сый-құрметке жетеді. Ел ағасы атанған шақта отбасында қадірлі, ортасында сыйлы, қызметте құрметті болса, одан артық бақыт жоқ та шығар.